Avropa Komissiyası Macarıstandan xarici müdaxiləyə qarşı yeni siyasi kampaniya çərçivəsində QHT və media qurumlarının xaricdən maliyyələşdirilməsini məhdudlaşdırmağa yönəlmiş mübahisəli qanun layihəsini geri götürməyi xahiş edib.

Axar.az xəbər verir ki, tənqidçilər mayın 13-də parlamentə təqdim edilən “İctimai həyatın şəffaflığı” adlı qanun layihəsinin Macarıstan hökumətinə mətbuatı və vətəndaş cəmiyyətində tənqidi səsləri sıxışdırmaq üçün geniş səlahiyyətlər verəcəyindən qorxurlar.

Qanun hakimiyyətə xaricdən maliyyələşən QHT və hökumətin milli suverenliyə təhlükə hesab etdiyi media qurumlarını siyahıya almağa və maliyyəni dondurmağa imkan verəcək. Xarici mənbələrdən vəsait axını davam edərsə, ciddi cəzalar olacaq.

Avropa Komissiyasının bu layihə ilə bağlı ciddi narahatlığı var. Əgər hazırkı formada qəbul olunarsa, bu, AB prinsipləri və qanunvericiliyinin ciddi şəkildə pozulması deməkdir. Ona görə də biz bu layihənin qanunvericilik prosesindən çıxarılmasını xahiş edirik. Bu layihə qəbul olunarsa, biz lazımi tədbirləri görməkdən çəkinməyəcəyik. Komissiya vətəndaş cəmiyyətinin roluna böyük əhəmiyyət verir və onların azadlığı və AB-də əlverişli mühitin yaradılmasına sadiq qalır”, - AK rəsmisi bildirib.