İyunun 2-də İstanbulda keçiriləcək Rusiya-Ukrayna danışıqlarının ikinci raundu çətin şəraitdə baş tutacaq. Tərəflər atəşkəs məsələsini müzakirə edəcəklər və bu, münaqişənin həlli yolunda mühüm bir nəticə ola bilər.

Axar.az xəbər verir ki, bunu Rusiya Dövlət Dumasının Beynəlxalq məsələlər komitəsinin sədri Leonid Slutski deyib.

"Danışıqların ikinci raundu Vladimir Zelenskinin Almaniya kansleri Fridrix Merzə qonaq getməsindən sonra çətin şəraitdə keçiriləcək", – deyə Slutski vurğulayıb.

Slutski əmin olduğunu bildirib ki, danışıqlar baş tutacaq və onların məqsədi Ukraynadakı münaqişənin tam həllinə aparacaq yol və mexanizmin hazırlanması olacaq.

Onun sözlərinə görə, Ukrayna tərəfi bəlkə də belə bir müzakirəyə hazır olmayacaq, lakin Rusiya “ən yaxşısından çıxış edəcək”:

"Əgər davamlı atəşkəsə nail olsaq, bu, münaqişənin dayandırılması yolunda əlamətdar nəticə olacaq".

Qeyd edək ki, Zelenskinin Almaniyaya son səfəri zamanı bu ölkənin Rusiya ərazisinə uzaqmənzilli raketlərlə zərbələr endirməyə qoyulan məhdudiyyətin aradan qaldırıldığı rəsmən təsdiqlənib.