Rusiya Ukrayna tərəfinə cəbhənin müəyyən hissələrində iki-üç günlük atəşkəs təklif edib.

Axar.az xəbər verir ki, bunu jurnalistlərə Rusiya Prezidentinin köməkçisi Vladimir Medinski Ukrayna ilə danışıqların ikinci raundundan sonra deyib.

“Biz cəbhənin müəyyən ərazilərində iki-üç günlük konkret atəşkəs təklif etdik. Komandirlər öz əsgərlərinin cəsədlərini götürə bilsinlər", - Medinski əlavə edib.

O, meyitlərin toplanmasının havaların isti keçməsi ilə əlaqədar olduğunu bildirib:

"İndi istidir, sanitar vəziyyət boz zonadadır, epidemiya təhlükəsi var. Biz fürsət yaratmaq istəyirik, xüsusən də Rusiya ordusu irəlilədiyi üçün onların əsgərləri bu boz zonadadır.

Ukrayna hərbçiləri bunun üzərində mümkün qədər tez çalışacaqlarına söz verib. Ümid edirəm ki, onlar bu məsələdə razılığa gələcəklər”.

Qeyd edək ki, bu gün İstanbulda Rusiya və Ukrayna nümayəndə heyətləri arasında danışıqların ikinci raundu baş tutub.