ABŞ Prezidenti Donald Tramp Çinə Ukraynaya qarşı müharibədə Rusiyaya dəstəyi dayandırması üçün təzyiq etməkdən çəkinir, diqqətini geosiyasi rəqibi ilə bağlı digər məsələlərə yönəldir.

Axar.az xəbər verir ki, bu barədə “Blumberq” agentliyi məsələ ilə tanış olan ABŞ və Avropa rəsmilərinə istinadən məlumat yayıb.

Qeyd olunur ki, hələlik Tramp administrasiyası Çinlə ikitərəfli məsələlərə fokuslanıb. Rəsmilərin fikrincə, Ukraynadakı müharibə ABŞ üçün getdikcə daha az prioritet məsələyə çevrilir. Bununla belə, onlar Vaşinqtonun hələ də mövqeyini dəyişə biləcəyini vurğulayıblar.

Agentlik bildirib ki, ABŞ-ın bu yanaşması Çini Rusiyanın Ukraynaya qarşı davam etdirdiyi müharibənin əsas amili hesab edən G7 ölkələrinin çoxdankı mövqeyindən uzaqlaşdığını göstərir. Mart ayında G7 ölkələrinin xarici işlər nazirləri Pekini Moskvanı dəstəklədiyinə görə açıq şəkildə qınayıblar.

Üstəlik, Tramp iyunun 5-də Çin lideri Si Szinpinlə telefon danışığı zamanı Ukraynadakı müharibəni müzakirə etmədiyini bildirib.

Agentlik hesab edir ki, bu ay Kanadada keçiriləcək G7 liderlərinin görüşündə məsələ qaldırıla bilər. Bununla belə, kiminsə Tramp administrasiyasını Çinlə bağlı bəyanat qəbul etməyə sövq edib-etməyəcəyi bəlli deyil.

Bir rəsmi bildirib ki, Tramp keçmiş prezident Co Baydenin digər hökumətlərlə bütün münasibətlərə Ukraynadakı müharibənin obyektivindən baxan xarici siyasət yanaşmasından uzaqlaşmaq istəyir. O əlavə edib ki, ABŞ-ın hazırkı prezidenti Çinlə tariflər, texnologiya məhdudiyyətləri və minerallara diqqət yetirmək istəyir.