Son zamanlar Rusiya Prezidenti Vladimir Putin və Çin Xalq Respublikasının sədri Si Szinpin, demək olar ki, mütəmadi görüşürlər. Şənbə günü, iyunun 25-də isə Rusiya prezidenti Çinə yola düşəcək.

Axar.az Nyus Vik-ə istinadən xəbər verir ki, Putinin səfərinin əsas müzakirə mövzusu silah alveri olacaq. Bir zamanlar Çin Rusiya silahlarının ən iri satış bazarlarından biri olub. Hazırda isə o özü silah istehsal etmək niyyətindədir.

Ehtimal ki, Rusiya prezidenti Pekini lazımi məhsulları Rusiyadan almağa razı salmaq istəyir.

Baş nazirin müavini Dmitri Roqozin bildirib ki, Çin Rusiyadan RD-180 raket mühərrikləri almaq fikrindədir.

Ehtimallara görə, Putin Çinə səfəri zamanı raket texnologiyaları sahəsində əqli mülkiyyətin qorunması haqqında saziş imzalaya bilər.

Politoloqların fikrincə, Pekin səfərinin ikinci bir səbəbi energetika sahəsinə investisiyaların axtarışıdır. Tərəflər qaz kəmərlərinin irimiqyaslı layihələrinin tikintisi üzrə maliyyə mübahisələrini müzakirə etməlidir.