Ukrayna böhranının sülh yolu ilə həlli və danışıqlar Qərbin real gündəmində heç vaxt olmayıb, əks halda o, Kiyevə silah tədarükünü dayandırardı.

Axar.az xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova bildirib.

“Əgər Qərb Ukraynada sülh istəyirdisə, yəqin ki, silah tədarükünü dayandırardı; yəqin ki, terror aktlarını maliyyələşdirməyi dayandırardı; yəqin ki, Kiyev rejiminin radikal ideologiyanı həyata keçirməsinə və yaymasına imkan verməzdi. Amma bunların heç birini etmirlər. Əksinə, silah tədarükünü, militarizasiyanı getdikcə daha israrla və daha aqressiv şəkildə müzakirə edirlər. Onlar getdikcə daha çox birbaşa və aqressiv şəkildə – ilk növbədə öz əhalilərini qorxutmaq yoluna əl atırlar.

Ona görə də məsələnin kökünə baxmaq və başa düşmək lazımdır ki, sülh danışıqları, ümumiyyətlə danışıqlar, siyasi-diplomatik nizamlanma anlayışları heç vaxt Qərbin – istər kollektiv Qərbin, istər NATO Qərbinin, istərsə də onun ayrı-ayrı üzvlərinin – həqiqi siyasəti və ya fəlsəfəsi olmayıb”, – Zaxarova vurğulayıb.