Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə Jurnalist Ekspert Mərkəzi İctimai Birliyinin (JEM) keçirdiyi “Aprel döyüşləri qəhrəmanlarının şücaət anını əks etdirən rəsmlərin yeniyetmə rəssamlar tərəfindən çəkilməsi və sərgilənməsi” layihəsi davam edir.

Kult.az xəbər verir ki, 4 ay müddətində (iyul-noyabr) keçirilməsi nəzərdə tutulan layihə çərçivəsində Azərbaycan Dövlət Uşaq Filarmoniyasında təhsil alan yeniyetmə rəssamlar 2016-cı ilin aprel döyüşlərində işğalçı Ermənistan ordusunun təxribatlarının qarşısını alarkən şəhidlik zirvəsinə ucalan əsgər və zabitlərin qəhrəmanlıq anının rəsmini çəkəcəklər.

Layihəni keçirməkdə məqsəd əsgərlərimizin qəhrəmanlıqlarını rəsmlərdə əbədiləşdirməklə yanaşı, gələcək nəslin yaradıcı nümayəndələrində vətənpərvərlik hissi oyatmaq, yeniyetmələri dövlətçilik ənənələrinə daim sadiq qalmağa, azərbaycançılıq məfkurəsinə söykənərək yaşayıb yaratmağa, vətən uğrunda canlarından keçən şəhidlərlə qürur duymağa sövq etməkdir.

50 qəhrəmanın təsvir olunduğu rəsm əsərlərinin çəkilmə prosesi yekunlaşandan sonra əsərlər Azərbaycan Hərb Tarixi Muzeyində sərgilənəcək. Sonda rəsm əsərləri muzeyə hədiyyə olunacaq, yeniyetmə rəssamlar diplom və hədiyyələrlə mükafatlandırılacaqlar.

Qeyd edək ki, rəssamlar qəhrəmanların obrazlarını yaradarkən tanınmış jurnalist Aida Eyvazlının aprel döyüşləri şəhidlərindən bəhs edən “Qalibiyyət - şahidlər və şəhidlər” kitabından yararlanıblar.