Braziliyanın Rio de Janeyro şəhərində, Azərbaycan adını daşıyan bələdiyyə məktəbində Azərbaycan Xalq Cumhuriyyətinin yüz illiyinə və Azərbaycanla Braziliya arasında diplomatik münasibətlərin qurulmasının iyirmi beş illiyinə həsr edilmiş rəsm müsabiqəsinin iştirakçıları və qalibləri olan şagirdlərin təltifləndirilməsi tədbiri keçirilib.

Azərbaycanın Braziliyadakı səfirliyindən Kult.az-a daxil olan məlumata görə, müsabiqənin qalibi olan, Heydər Əliyev Mərkəzinin rəsmini çəkən Allan Rodriges Roki, müsabiqədə iştirak etmiş digər şagirdlərə səfir Elxan Poluxov tərəfindən müxtəlif hədiyyələr təqdim edilib. Bundan əlavə, məktəbin bütün şagird və müəllim heyətinə Azərbaycanla Braziliyanın Dövlət Bayraqlarının əks olunduğu döş nişanı hədiyyə verilib.

Tədbir zamanı məktəbin direktoru və müəllim heyətinə Azərbaycan Xalq Cumhuriyyətinin yüz illiyinə və Azərbaycanla Braziliya arasında diplomatik münasibətlərin qurulmasının iyirmi beş illiyinə həsr edilmiş rəsm müsabiqəsinin təşkil edildiyinə görə təşəkkürnamə təqdim edilib və xatirə şəkilləri çəkdirilib.

Tədbirin sonunda Azərbaycan Dövlət Bayrağının rənglərində olan yüz ədəd şar məktəb şagirdləri ilə birlikdə havaya buraxılıb.