Sosial şəbəkələrdə Azərbaycan Dövlət Rəssamlıq Akademiyasında qəbul imtahanının sınaq mərhələsində abituriyentlərin çəkdiyi və ən yüksək balla qiymətləndirilən rəsmlərin fotosu yayılıb.

Akademiyanın tələbələrindən birinin paylaşdığı şəkillər sosial şəbəkə istifadəçiləri arasında tənqid edilib. Qəbul imtahanının sınaq mərhələsindən keçən tələbələrin çəkdiyi bu şəkillər gülüş obyektinə çevrilib.

Məsələ ilə bağlı Kult.az-a açıqlama verən Azərbaycan Dövlət Rəssamlıq Akademiyasının məsul katibi Rəsul Hüseynov bildirib ki, sosial şəbəkələrdə tənqid hədəfinə çevrilən rəsmlərdən xəbərsizdir.

Onun sözlərinə görə, müəllifləri tənqid etməzdən əvvəl düşünmək lazımdır ki, onlar hələ təhsilsiz və təcrübəsizdir:

“Sözügedən rəsmlərin Rəssamlıq Akademiyasına qabiliyyət imtahanı verən şəxslərin çəkməsi barədə bir söz deyə bilmərəm. Əgər doğrudan da rəsmlər Akademiyaya qəbul olmaq istəyən şəxslərin əl işidirsə, müəllifləri tənqid etməmişdən əvvəl onların təcrübəsizliyini də nəzərə almaq lazımdır”.

R.Hüseynov bildirib ki, çəkilən rəsmlərə verilən balların artıq və ya əskik olmasına ancaq komissiya toplanıb rəy verə bilər:

“Sözügedən rəsm əsərlərinə 80-90 yaşında peşəkar rəssamlar qiymət veriblərsə, burda nə var ki! Həmin şəxslər Akademiyaya məhz rəssamlıq sənətini öyrənmək üçün qəbul olunurlar. İlkin mərhələdə əl işlərinin zəif olması normaldır.

Ümumiyyətlə, Rəssamlıq Akademiyasına qabiliyyət imtahanına təqdim olunmuş rəsm əsərləri primitiv də ola bilər, yüksək səviyyədə də. Akademiyaya qəbul olunmaq üçün abituriyentlər minimum əl işlərindən 6 bal toplamalıdır. Akademiyaya qabiliyyət imtahanı 3 mərhələdə keçirilir. Abituriyentlər birinci mərhələdə qələmlə çəkilmiş rəsmlər, ikinci mərhələdə natürmot, ya portret, üçüncü mərhələdə isə təsəvvürünə uyğun kompozisiya yaratmalıdırlar”.

Xatırladaq ki, Azərbaycan Dövlət Rəssamlıq Akademiyası akademiyada təhsil almaq şansı qazanan tələbələrin əl işlərini universietin rəsmi saytında yerləşdirir.