Xəbər verdiyimiz kimi, Qubada 2003-cü il təvəllüdlü hamilə Səbinə Əmrahova antibiotik iynə vurdurduqdan sonra səhhəti pisləşib və dünyasını dəyişib.

Məsələ ilə bağlı Axar.az-a açıqlamasında həkim-professor Adil Qeybulla qeyd edib ki, antibiotikdən və digər dərmanlardan güclü allergik reaksiyaların olması gözlənilir:

“Hətta anafilaktik şok əmələ gətirən maddələr siyahısında penisillin vaxtilə ayrıca qeyd olunurdu.

Bəzən suallar gəlir ki, anafilaktik şokdan necə qaçmaq olar? Təəssüf ki, bununla bağlı uğurlu bir metod yoxdur. “Prob” dediyimiz sınaqlar mənasızdır. Çünki sınağın özündən də şok yarana bilər. Ancaq burada xəstənin tibbi məlumatlarını toplamaq həkimə işində xeyli kömək edir.

Xəstəyə antibiotik vurulubmu? Allergiyası varmı? Hansısa dərmana və ya qidaya allergiyası olubmu? Ən azı bu şeylər müəyyən qədər şokların və ya reaksiyaların qabağını almağa kömək edir. Hansısa şübhə yaradan xəstələrdə isə desensibilizasiyaedici vəziyyət yaratmaq lazımdır. Bunun üçün xəstələrə “Suprastin”, “Dimedrol” və digər maddələr vurulur ki, xəstədə həssaslıq aşağı düşsün.

Digər tərəfdən, xəstəxanada mütləq “Prednizalon”, “Deksametazon” və digər dərmanlar olmalıdır ki, xəstə anafilaktik şoka düşən zaman lazımi tədbirlər görülə bilsin.

Nəticə olaraq, “hamilə qadına antibiotik vurula bilərmi?” sualına cavab verməli olsaq, bəli, vurula bilər. Lakin hansı infeksiya, yaxud hansı xəstəlik varsa, nəzərə alınmalıdır.

Hamilə qadın xəstələnərsə, birinci ananın səhhəti nəzərə alınmalıdır. Bu, ümumi prinsipdir”.