Antioksidant, vitamin və faydalı yağlarla zəngin meyvələr beyin fəaliyyətini dəstəkləyərək yaddaş və diqqətin yaxşılaşmasına kömək edə bilər.

Axar.az xəbər verir ki, bu barədə Türkiyə mediası məlumat yayıb.

Yaddaş üçün ən faydalı meyvələr sırasında qaragilə, çiyələk, nar, portağal, avokado və alma yer alır. Qaragilə və çiyələk tərkibindəki flavonoidlər öyrənmə və yaddaşı dəstəkləyir, nar antioksidant xüsusiyyətləri ilə beyin hüceyrələrini qoruyur. Portağaldakı C vitamini oksidləşdirici stressi azaltmağa kömək edir, avokado sağlam yağları ilə beyin qan dövranını dəstəkləyir, alma isə kversetin adlı antioksidant vasitəsilə sinir hüceyrələrinin qorunmasına töhfə verir.

Mütəxəssislər vurğulayırlar ki, bu meyvələr möcüzəvi təsir göstərməsə də, balanslı qidalanma və sağlam həyat tərzi ilə birlikdə müntəzəm istehlak edildikdə beyin sağlamlığının qorunmasına dəstək ola bilər.