Bioloji Təbabət Klinikasının həkimi, tanınmış nevropatoloq Vahid Məmmədov vəfat edib.

Bu barədə Axar.az-a klinikadan məlumat verilib.

Bildirilib ki, 10 ilə yaxın bir müddətdə Bioloji Təbabət Klinikasında çalışan ali dərəcəli nevropatoloq Vahid Məmmədov bu gün dünyasını dəyişib.

Qeyd edək ki, Vahid Məmmədov 1948-ci ildə Quba rayonunun Qonaqkənd qəsəbəsində anadan olub. Əmək fəaliyyətinə 1972-1974-cü illərdə ordu sıralarında alay həkimi kimi başlayıb. 1974-1976-cı illərdə Sumqayıt şəhər tibb məntəqəsində həkim-nevropatoloq, 2 nömrəli Sumqayıt Şəhər Xəstəxanasında baş həkim, 1984-1992-ci illərdə Sumqayıt Şəhər Bərpa-Müalicə Xəstəxanasında şöbə müdiri, baş həkim, 2007-2008-ci illərdə isə Abşeron Rayon Poliklinikasında, Abşeron Rayon Mərkəzi Xəstəxanasında baş həkim vəzifələrində işləyib.

Vahid Məmmədov 2009-cu ildən Bioloji Təbabət Klinikasında çalışırdı.

Qeyd edək ki, mərhumun yas mərasimi Nəsimi rayonu, Tbilisi prospekti, 20 yanvar küçəsi-ev 53-də keçiriləcək.

Allah rəhmət eləsin!