Koronavirusun mutasiyaya uğramış yeni növü ilə bağlı əvvəlcə özümüz öyrənib, araşdırma aparacağıq, sonra isə ehtiyac olarsa, tədqiqatlar başladılacaq.

Bu barədə Axar.az-a açıqlamasında AMEA-nın vitse-prezidenti, Biologiya və Tibb Elmləri Bölməsinin Elmi Şurasının sədri akademik İradə Hüseynova deyib.

“Koronavirusla bağlı birbaşa tədqiqatı həyata keçirməyə imkan verən xüsusi laboratoriyalar yoxdur. Biz proyektlər vermişik, yəqin ki, Nazirlər Kabineti maliyyələşdirəcək, səhiyyə müəssisələri ilə birlikdə eksperimental tədqiqatlara başlanılacaq. Burada hansı genomların ayrılması, hansı ştampların olması və s. məsələlərlə bağlı işlər görüləcək. Koronavirusun mutasiyaya uğramış yeni növü ilə bağlı hələlik biz özümüz öyrənirik. Bundan sonra lazım olarsa, tədqiqatlara başlayacağıq”, - o bildirib.

Qeyd edək ki, Ümumdünya Səhiyyə Təşkilatı (ÜST) koronavirusun mutasiyaya uğraması ilə bağlı həyəcan təbili çalıb. İngiltərə, Niderland, Danimarka və Avstraliyada qeydə alınan və B.1.1.7 adlanan virusun daha sürətli yayılması və öldürücü olması ilə bağlı iddialar var.