Aidiyyəti qurumlar Britaniya ştammının necə müəyyənləşdirilməsini ictimaiyyətə açıqlamalıdır.

Bunu Axar.az-a Azərbaycan Həkimləri İctimai Birliyinin sədr müavini, tanınmış həkim-radioloq Aydın Əliyev deyib. O bildirib ki, Britaniya ştammının ölkəmizə gəlmə ehtimalı yüksək olsa da, onun dəqiq müəyyənləşdirilməsi üçün görülən işlər barədə məlumat verilməlidir:

“Bir müddət əvvəl Azərbaycanda genom analizini təyin etmək üçün lazımı şəraitin olmadığı bildirilmişdi. Ola bilər ki, indi belə şərait qurulub. Ona görə bununla bağlı açıqlanma verilməsi lazım olduğunu düşünürəm. Çünki bu ştammı Türkiyənin özündə belə müəyyənləşdirmək asan olmayıb”.

Məsələ ilə bağlı saytımıza açıqlama verən Milli Hematologiya və Transfuziologiya Mərkəzinin genetika mütəxəssisi Ağa Rza Ağayev bildirib ki, mutasiyaya uğramış virusun yeni növlərinin aşkarlanması və onların klinik əhəmiyyəti genom çalışmaları ilə araşdırılır:

“Bunlar xüsusi çalışmalardır və araşdırma tədqiqat laboratoriyalarında icra olunur. Bu istiqamətdə ölkəmizdə də tədqiqatlar aparılır”.