Şenzhen Universitetinin alimləri müəyyən ediblər ki, gündəlik könüllü mikro ianələr emosional rifahı əhəmiyyətli dərəcədə yaxşılaşdıra və depressiya əlamətlərini azalda bilər.

Axar.az Publika.az-a istinadən xəbər verir ki, depressiya əlamətləri olan 883 nəfərin iştirak etdiyi üç sınaqda tədqiqatçılar iştirakçılardan "Tencent" xeyriyyə platforması vasitəsilə hər gün ən azı bir fen (0.02 AZN) ianə vermələrini xahiş ediblər. Nəticələr göstərib ki, iki aylıq mikrodonasiya proqramında iştirak edənlərin əhval-ruhiyyəsində davamlı yaxşılaşma və depressiv simptomlarda azalma var.

Maraqlıdır ki, ianənin məbləğindən asılı olmayaraq, müsbət dəyişikliklər baş verib.

Tədqiqatın müəllifləri vurğulayıblar ki, depressiyadan əziyyət çəkən insanlar üçün altruizmin sosial formaları – könüllülük və ya yaxşı işlər görmək – yorucu ola bilər. Digər tərəfdən, ianələr digər insanlarla qarşılıqlı əlaqə tələb etmir, lakin yenə də əlaqə və məna hissi verir.

"Hətta bir fen bağışlamaq qayğıkeşlik və aidiyyət aktı ola bilər. İştirakçılar ianə verdikdən sonra sevinc və məmnunluq hiss etdiklərini və bəziləri hətta sikkənin özünün dəyərini fərqli qəbul etməyə başladıqlarını bölüşdülər”, - tədqiqat müəllifi bildirib.

Tədqiqatçılar ümid edirlər ki, onların işləri xeyriyyə təşkilatlarını təkcə pul toplamağa deyil, həm də gündəlik xeyirxahlıq vasitəsilə insanların psixi sağlamlığına dəstək verməyə yönəlmiş platformalar yaratmağa ruhlandıracaq.