Ukraynanın paytaxtı Kiyevdə “QaşoTyu” IV Beynəlxalq Komediya Sənəti Festivalı işinə start verib.

Kult.az xəbər verir ki, festival dörd - ən yaxşı qısametrajlı komediya filmi, komedik pyes, məzəli hekayə və məzəli foto nominasiyalarında keçirilir.

Festivalın təşkilat komitəsinə daxil olan həmyerlimiz, rejissor və ssenarist Tərlan Göycəli Azərbaycanın bu festivalda “məzəli foto” nominasiyası üzrə iştirak etdiyini söyləyib. Onun sözlərinə görə, ölkəmizi festivalda Arzu Mürvətova təmsil edir.

Qeyd edək ki, festivalda qalib gələn qısametrajlı filmlər Ukraynanın müxtəlif şəhərlərinin kinoteatrlarında və mərkəzi kanallarda nümayiş etdiriləcək, pyeslər və hekayələr böyük şəhərlərin teatrlarında səhnələşdiriləcək, foto nominasiyasının qaliblərinin isə fərdi foto sərgiləri açılacaq.