YARAT Müasir İncəsənət Mərkəzi oktyabrın 13-də rejissor Riçard Robbinsin "Qızların yüksəlişi" (Girl Rising) adlı filmini nümayiş etdirəcək.

Axar.az xəbər verir ki, filmin nümayişi YARAT Film Klubunun layihəsi çərçivəsində təşkil ediləcək və sual-cavab sessiyası ilə davam edəcək.

Qeyd edək ki, Akademiya Mükafatının nominantı olan rejissor Riçard Robbins "Qızların yüksəlişi" adlı filmində 9 ölkənin 9 qeyri-adi qızı haqqında 9 görkəmli yazıçının hekayələrini 9 məşhur aktrisanın ifası ilə təqdim edir. Qismətlərinə məcburi ərə verilmə, uşaq köləliyi və sair ürəkağrıdan ədalətsizliklər düşsə də, bu qoçaq qızlar bütün çətinliklərə ümid və inadla sinə gərirlər. İnsan ruhunun qüdrətini nümayiş etdirən bu əhvalat bariz şəkildə onu göstərir ki, təhsilin gücü ilə bu dünya mütləq dəyişəcək.

1 saat 41 dəqiqə olan film ingiliscə nümayiş etdiriləcək. Giriş pulsuzdur.