Köhnə filmlərimiz həm süjet xəttinə, həm dialoqlarına, həm də aktyor-aktrisa heyətinə görə gözümüzün əzbəridir. Bu filmlərdə böyük sənətkarlarımızla yanaşı, qonşu dövlətlərdən dəvət olunmuş aktrisalar da uğurla çıxış edərək bizə doğmalaşıb.

Axar.az Azərbaycan filmlərində rol alan və tamaşaçılar tərəfindən çox sevilən əcnəbi aktrisalar haqda yazını təqdim edir:

Fəxrəddin Manafovun sevimli Meral Konratı

Məşhur Təhminə... Türk aktrisa, müğənni, maneken və aparıcı olan Meral Konrat əslən Krım tatarıdır. Özünü sənətin müxtəlif sahələrində sınayan Konrat bir vaxtlar ssenarilər də yazıb. Biz isə onu daha çox "Təhminə" filmindəki unudulmaz qadın kimi tanıyırıq.

İlk filmi ilə mükafat alan aktrisa 1993-cü ildə rejissor Rasim Ocaqov tərəfindən Azərbaycana dəvət olunur. Yazıçı Anarın "Beşmərtəbəli evin altıncı mərtəbəsi" əsəri əsasında çəkilən "Təhminə" filmində rol almağı məmnuniyyətlə qəbul edən aktrisa rolunun öhdəsindən məharətlə gəlir və Azərbaycan tamaşaçısının sevimlisi olur. Sevilən aktyorumuz Fəxrəddin Manafovla unudulmaz bir melodram yaradan Təhminə mühafizəkar cəmiyyətə qarşı mübarizə aparır, lakin bu mübarizədə çoxluq təşkil edən cəmiyyət qalib gəlir. Təhminə həm tək, həm də tənha qalır. Və bu mübarizə onun məhvinə gətirib çıxarır.

Qayınanasına zülm edən İnarə Quliyeva

"Adın qalsın, Afət!" Filmimizin ən məşhur əcnəbi qadın oyunçularından biri, "Qayınana" filminin Afəti – İnarə Quliyeva Moskva şəhərində dünyaya gəlib. Rusiyanın əməkdar artisti olan aktrisanın babası azərbaycanlıdır. O, 1978-ci ildə məşhur "Qayınana" filminə çəkilir, mərhum aktrisa Nəsibə Zeynalova, xalq artisti Fuad Poladov, İlham Namiq Kamalla eyni filmdə rol alır.

Filmdəki obrazı haqqında danışan İnarə xanım böyük sənətkar Nəsibə Zeynalovanı maraqlı bir zarafatla yada salır:

"Afət obrazında mənim öz xarakterimdə olan xüsusiyyətlər də var. Amma deyim ki, Nəsibə xanımın oynadığı qayınanalar da həyatda az deyil. Ancaq çəkiliş prosesində Nəsibə xanım hamıya qarşı həddindən artıq mülayim, gülərüz, diqqətcil və hörmətlə davranırdı".

Filmdə rolunu məharətlə canlandıran İnarə Quliyeva bu gün də uşaqdan böyüyə hamı tərəfindən Afət kimi tanınır. Bir sözlə, rolu ona öz adını xatırlamağa imkan vermir.

Amaliya Pənahovanın qısqandığı qadın – Tamara Yandiyeva

Unudulmayan qadın... İnquşetiyalı gözəl aktrisa Tamara Yandiyeva çəkildiyi 18 filmin 16-da baş rolu canlandırıb. O, daha çox "Bəbək" filmindəki Pərvin obrazı ilə bizə tanışdır. Hazırda Moskvada yaşayan Tamara Yandiyeva Rusiya, Çeçen-İnquş, Şimali Osetiya və Abxaziyanın əməkdar artisti, İnquşetiyanın xalq artistidir. Yandiyevanın eyni zamanda müğənnilik fəaliyyəti də olub. "Loam" qrupunun üzvü olan Ruslan Naurbiyevlə ifa etdiyi "Xyu sayran xita eça" ("Sən çeşmə başına gələndə") mahnısı ilə bütün Qafqazda məşhurlaşıb.

Bakıda faciə ilə üzləşən Nonna Paçuaşvili

Gürcü qızı Nonna Tiflis Teatr İnstitutunu bitirib və Şota Rustaveli adına Gürcü Dövlət Dram teatrında çalışmağa başlayıb. Teatr aktrisası olan Nonna Paçuaşvili həyatı boyu yalnız bir neçə filmə çəkilib ki, bunun da biri Azərbaycan filmi olan "Əhməd haradadır" filmidir. O, filmdə Əhmədin bacısı, sürücü Əhmədin sevgilisi Ceyran rolunu canlandırır. Film çəkilişlərindən əvvəl onun həyatında faciə yaşansa da, aktrisa maraqlı bir obraz canlandırmağa müvəffəq olur. Nonna Paçuaşvili həmin illəri belə xatırlayır:

"Məni bu rola dəvət edəndə həyat yoldaşım Tamazi ilə yeni evlənmişdik. Həm zahirən, həm də daxilən çox gözəl insan idi. Mən institutun 3-cü, o isə 5-ci kursunda oxuyurdu. Filmin çəkilişləri vaxtı Tamazi məni görmək üçün Bakıya gəldi. Mehmanxanada səs valları ilə işləyən mikrofonun düyməsini basanda qəfildən onu elektrik cərəyanı vurdu. Yoldaşım gözümün qarşısında canını tapşırdı. Onda mən hamiləliyimin dördüncü ayını yaşayırdım. Çəkilişlərdən imtina eləmək istəyirdim, çünki çox ağlayırdım. Amma elə o vəziyyətdə də işimi davam etdirdim. Sonra oğlum dünyaya gəldi, adını elə atasının şərəfinə Tamazi qoydum".

Azərbaycan filminin Mətanəti – Tamara Kokova

"Bir məhəllədən iki nəfər" filmində Həlimə, "İyirmialtılar" filmində Çaparidzenin arvadı, "Torpaq, dəniz, od, səma" filmində Gülsüm rollarını canlandıran Tamara Kokova yaddaşımızda daha çox "Bir qalanın sirri" filmindəki Mətanət rolu ilə qalıb. Film-nağılda amansız hökmdara qarşı kasıb, qeyrətli insanların mübarizəsindən danışılır.

Aktrisa bu filmə görə sevilsə də, ona başqa bir filmimizin uğur gətirdiyini bildirib:

"Azərbaycan tamaşaçılarının "Bir qalanın sirri" filminə hələ də həvəslə tamaşa etmələrinə görə çox şadam. Bununla belə, mənim üçün əlamətdar olan film Əjdər İbrahimovun "Bir məhəllədən iki nəfər" filmidir. Bu film SSRİ-də və xaricdə xeyli uğur qazanmışdı və mənə böyük şöhrət gətirdi. Bundan sonra müxtəlif filmlərə dəvət almağa başladım".

Rəşid Behbudovun əziz dostu – Tamara Çernova

Bəxtiyarın Saşası... Böyük Vətən Müharibəsi illərində "Uralmaş" zavodunda çalışan, hospitallarda növbətçi olan Tamara Çernovanın ulduzu anidən parlayır. 1947-ci ildə Leninqradda Teatr İnstitutunun aktyorluq fakültəsinə qəbul olunur və bir ilə yaxın təhsil alır. 1950-ci ildə filmlərin çox az çəkildiyi dövrdə ekranlaşdırılan "Qoçaq insanlar" filmində debüt edən Tamara dərhal məşhurlaşır. Lakin ailə qurduğuna və ana olduğuna görə uğurlu film təkliflərindən imtina edir.

1955-ci ildə "Bakı kinostudiyası"nın çəkdiyi "Bəxtiyar" filmində Rəşid Behbudovun tərəf-müqabili, uşaqlıq dostu və sevdiyi Saşa rolunu canlandırır. Filmdə sədaqətli dostluq bağları, hicran, saf duyğular öz əksini tapır. Uzun çəkişmələrdən, maneələrdən sonra Bəxtiyarla Saşa bir-birinə qovuşur.

Tamara Çernova hazırda ABŞ-da yaşayır.