Dünən Nizami Kino Mərkəzində "Qatil" filminin təqdimat mərasimi keçirilib.

Axar.az xəbər verir ki, təqdimat mərasimində dövlət və hökumət rəsmiləri, elm və mədəniyyət xadimləri, ziyalılar, ictimaiyyət nümayəndələri iştirak ediblər. Mərasimdə çıxış edən C.Cabbarlı adına "Azərbaycanfilm" kinostudiyasının direktoru Müşfiq Hətəmov filmə beynəlxalq arenada böyük maraq olduğunu bildirib:

"Hazırda Türkiyə və Rusiya prodüserləri "Qatil" əsərini yenidən ekranlaşdırmaq üçün bizə müraciət ediblər. Eyni zamanda, görkəmli yazıçımızın digər əsərinin ekranlaşdırılması ilə bağlı bir sıra Avropa kinoşirkətlərindən təkliflər almışıq və bu məsələ yaxın vaxtlarda həllini tapacaq".

Xalq yazıçısı Elçin də ekran əsərinin tamaşaçıların xoşuna gələcəyinə inandığını deyib: "Bu gün film ilk dəfədir geniş ictimaiyyətə təqdim edilir. Filmin Azərbaycan dilində səsləndirilməsi də vacib məsələ idi. "Azərbaycanfilm" kinostudiyası bu işin öhdəsindən bacarıqla gəlib".

Qeyd edək ki, filmin ssenari müəllifi xalq yazıçısı Elçin Əfəndiyev, quruluşçu operatoru Mixail Maqalaşvili, icraçı prodüserləri Azər Quliyev və Katri Zətt, prodüseri Müşfiq Hətəmovdur. Baş rolları gürcü aktyorları Eka Çxeidze və Apollon Kublaşvili canlandırıblar.