Fransanın TV5 Monde beynəlxalq televiziya kanalında "Hədəf Bakıdır. Hitler neft uğrunda döyüşü necə uduzdu" sənədli filmi nümayiş etdirilib.

Axar.az xəbər verir ki, filmin çəkilməsində məqsəd Azərbaycan xalqının faşizm üzərində qələbədə rolunu bütün dünyaya göstərmək və eyni zamanda, bu tarixi həqiqəti gələcək nəsillərə çatdırmaqdır.

Prezident İlham Əliyevin qızı Arzu Əliyevanın layihə rəhbəri olduğu sənədli film faşizm üzərində Qələbənin 70 illiyinə həsr edilib. Çəkilişləri 14 ay davam edən filmin üzərində iş zamanı bir sıra ölkələrin arxivlərində olan çoxlu sayda sənəd araşdırılıb. Filmdə İkinci Dünya müharibəsinin tarixinə tamamilə yeni baxış bucağından – neft uğrunda savaş prizmasından baxılır.

"Hədəf Bakıdır. Hitler neft uğrunda döyüşü necə uduzdu" sənədli filmi noyabrın 13-də yerli vaxtla gecə saat 01:30-da TV5Monde televiziya kanalında yenidən yayımlanacaq. Filmə noyabrın 15-dək kanalın internet saytında baxmaq olar.