"Axınla aşağı" bədii filmi noyabrın 20-28-i tarixlərində İtaliyanın paytaxtı Romada keçiriləcək 16-cı ASIATICA ("Asiya kinosu ilə görüşlər" - Encounters with Asian Cinema) Beynəlxalq Film Festivalına dəvət alıb.

Axar.az xəbər verir ki, film festivalın əsas müsabiqə proqramında nümayiş olunacaq.

Xatırladaq ki, "Axınla aşağı" filmi 2014-cü ildə Azərbaycan Respublikası Mədəniyyət və Turizm Nazirliyinin sifarişi ilə Cəfər Cabbarlı adına "Azərbaycanfilm" kinostudiyasında istehsal olunub. Filmin ssenari müəllifləri Asif Rüstəmov və Otar Pertaxia, quruluşçu operatoru Ayxan Salar, quruluşçu rəssamı Rafiz İsmayılov, bəstəkarı Xəyyam Mirzəzadə, icraçı prodüseri Nadir Əliyev, prodüseri Müşfiq Hətəmovdur. Filmdə baş rolları Namiq Ağayev, Mehriban Zəki, Aleksandra Andrejevska, Teymur Məmmədov və digərləri canlandırırlar.

Qeyd edək ki, bu yaxınlarda "Axınla aşağı" Avstriyada keçirilən "LET’S CEE" Beynəlxalq Film Festivalının "İddialı debüt" müsabiqə proqramında "Münsiflər heyətinin xüsusi vurğuluması" mükafatına layiq görülüb.