Hər şey lazım olan nöqtəyə yavaş-yavaş gəlib çatır.

Bu sözləri xalq artisti Nurəddin Mehdixanlı yeni çəkilən seriallarla bir neçə il əvvəl lentə alınanların müqayisəsi ilə bağlı Axar.az-a danışarkən deyib. Onun sözlərinə görə, hazırda serialların çəkilişində peşəkar komandalar çalışır:

"Əlbəttə, əvvəlki illərə nəzərən xeyli inkişaf var. Nə Moskva birdən-birə qurulub, nə də Azərbaycan öz müstəqilliyini bir gündə qazanıb. Hər şey lazım olan nöqtəyə yavaş-yavaş gəlib çatır. Serialların da inkişafına bu şəkildə baxmaq lazımdır. Bu gün çəkilən seriallarla, haradasa, 5 il bundan əvvəl çəkilən seriallar arasında çox fərq var. Həm texniki baxımdan, həm aktyorlara göstərilən hörmət, qayğı baxımdan irəliləyiş hiss olunur.

Yəqin ki, hər kəs fikir verir, artıq bir çox seriallara peşəkarları dəvət etməyə başlayıblar. İndi serial çəkənlər əvvəlki kimi kiminsə sevgilisi, qohumu, dostu deyil: sırf peşəkar komandalar çalışır. Mən də bir serialda rol alıram və həm aktyora qarşı münasibətdən, həm qonorardan məmnunam".