Biz rahatlaşmaq üçün psixoloqa, ya da kilsəyə getmirik. Bir az yürüşə çıxırıq, vəssalam.

Axar.az-ın xəbərinə görə, bu sözləri İslandiyadan olan dünya şöhrətli musiqiçi Byork deyib.

Musiqiçi yaşadığı yerlərdən danışıb: "Reykyavikin şəhərkənarında böyümüşəm. Yaşadığım mənzil buradakı mənzil bloklarının sonuncusu idi. Sonrası tundra və bataqlıq idi. Buralarda tək-tənha yürüş edər, bağıra-bağıra mahnı oxuyardım.

Bir çox islandiyalının da belə etdiyini düşünürəm. Özünüzü yaxşı hiss etmək üçün kilsəyə ya da psixiatra getməkdənsə çıxıb bir az gəzişsəniz, rahatlaşarsınız".

Müğənni uşaq vaxtı avtostopla təkbaşına tura çıxdığını da söyləyib: "13 yaşımda əlimə keçən ilk pulla çadır almışdım. Düşərgə qurmaq üçün evdən çıxıb avtostopla meşəyə getdim. Təbiətin qoynunda olmaq adama inanılmaz rahatlıq verir".