Dekabrın 4-də Heydər Əliyev Sarayında Rusiya Kinematoqrafçılar İttifaqının sədri və Rusiya Mədəniyyət Fondunun prezidenti, kinorejissor və aktyor Nikita Mixalkovun yaradıcılıq gecəsi keçiriləcək.

Axar.az xəbər verir ki, xalq artisti "Özününkülərin arasında" (Svoy sredi svoyix) adlı proqramla azərbaycanlı tamaşaçılarının qarşısına çıxacaq.

Kann, Venesiya kimi dünyanın nüfuzlu kino festivallarının qalibi, "Oskar" mükafatı laureatı Nikita Mixalkov bir çox filmlərin rejissoru, ssenaristi, baş prodüseri və bədii rəhbəridir. Sovet kino rejissoru, ssenaristi və aktyoru, xarici dildə ən yaxşı filmə görə "Oskar" mükafatı laureatı olan Nikita Mixalkov "Beş gecə", "Piano üçün yarımçıq qalmış pyes", "Oblomovun həyatından bir neçə gün", "Şahidlərsiz", "Qara gözlər", "Urqa", "Günəşdən usanmışlar", "Sibir bərbəri", "12", "Günvurma" və bir çox başqa filmlərin müəllifidir.

Qeyd edək ki, tədbirin biletləri 20-60 AZN arasında dəyişir. Biletləri şəhərin kassalarından əldə etmək olar.