Yaşlı aktyorlar gənclərə dəstək vermirlər.

Bu sözləri gənc aktyor Səməndər Rzayev yaşlı nəsildən olan aktyorların onlara dəstək olmaması haqda Axar.az-a danışarkən deyib. Gənc aktyor yaşlı həmkarlarını sərt şəkildə ittiham edib:

"Bizdən böyük olan aktyorların əllərində hər cür imkan, şərait var ki, böyük bir məktəb yaratsınlar, gənclərə dəstək olsunlar. Heç birindən dəstək görmürəm. Amma gündə gedib 5-10 dənə toyda hoppanıb-düşürlər, artıq onların hoppanıb-düşən yaşları deyil. Xaricdə bütün sənətkarlar cavanlara dəstək olurlar, onları qabağa çəkirlər. Bizimkilər elə bilirlər, bu sənəti özləri ilə qəbirə aparacaqlar.

Köhnə sənətkarlarımızdan Yaşar Nurini, Səyavuş Aslanı hamı sevirdi. Onların yerinə gələnlərin çoxu elə də güclü aktyor deyil. Bundan əlavə, insani keyfiyyətləri də yoxdur. Bu yaxınlarda filmimin təqdimatı oldu. Ora tanınmış sənətkarları dəvət etmişdim, amma çoxu gəlmədi. Gəlsələr, adam sevinər ki, gəldilər, dəstək oldular. Artıq gəlməyəndə başa düşürsən ki, bunlar indidən rəqabətə başlayırlar. Halbuki heç bir rəqabət ola bilməz. Başqalarından fərqli olaraq, Fərda Xudaverdiyev, Vəfa Zeynalova gəlib dəstək oldu".