Mədəniyyət və Turizm Nazirliyinin sifarişi ilə C.Cabbarlı adına Azərbaycanfilm kinostudiyasında "İçərişəhər" adlı tammetrajlı bədii filmin çəkilişləri bitib.

Axar.az xəbər verir ki, ssenari müəllifləri Təhminə Rafaella və İlqar Safat, quruluşçu rejissoru İlqar Safat, quruluşçu operatoru Luca Coassin (İtaliya), quruluşçu rəssamı Bütünay Haqverdiyev, icraçı prodüseri Ülvi Qasımov, prodüseri Müşfiq Hətəmov olan psixoloji dram janrındakı filmin tizeri yayımlanıb.

Filmdə baş rolları Təhminə Rafaella, Firdovsi Atakişiyev, Mehriban Zəki və Elmira Şabanova canlandıracaqlar.

Filmin çəkilişləri Bakı və Zaqatalada aparılıb. Film yaşıdlarının bəsit ambisiyalarından uzaq olan, arzularla yaşayan gənc tələbə Arzu və xəyalları puç olmuş Qarabağ müharibəsi veteranı Rafaelin sevgisindən bəhs edir. Hekayədə əsrlər boyu milli mentalitetin hökm sürdüyü ölkədə gənc qadın üçün ənənələrə zidd olan dəyərlərlə yaşamaq və azad sevməyin nə olduğu, eləcə də cəmiyyətinin ümidlərini doğrultmayanda çəkdirilən əzablar əks olunub.