Bu gün böyük kinorejissor, ssenarist, xalq artisti, Şöhrət və Şərəf ordenli Eldar Quliyevin doğum günüdür.

Axar.az xatırladır ki, Eldar Quliyev 1941-ci il yanvarın 18-də Bakı şəhərində anadan olub. O, 1960-1966-ci illərdə Moskvada ÜDKİ-nin rejissorluq fakültəsində, Serqey Gerasimovun kursunda təhsil alıb. 1967-ci ildə "Azərbaycanfilm" kinostudiyasında çalışmağa başlayan Eldar Quliyevin ssenari müəllifi olduğu ilk ekran əsəri "Biri vardı, biri yox..." qısametrajlı filmidir.

O, 1969-cu ildə ilk böyük ekran əsəri olan "Bir cənub şəhərində" filmi ilə özünü təsdiqləyib və bu filmlə Azərbaycan kinosunda yeni bir mərhələnin təməlini qoyub.

Eldar Quliyev 1979-cu ildə "Babək" filmini çəkir və bu film professionallıq səviyyəsinə, kütləvi və batal səhnələrin miqyasına görə heç də xaricdə istehsal olunan bu tipli filmlərdən geri qalmır. Həmin illərdə "Babək" filmi 52 ölkə tərəfindən satın alınıb. Bunlarla yanaşı o, "Ən vacib müsahibə", "Var olun, qızlar...", "Ürək... Ürək...", "Nizami", "Nə gözəldir bu dünya...", "Girov", "İstanbul reysi", "Dərvişin qeydləri" və s. filmlərə quruluş verib. Eldar Quliyevin çəkdiyi filmlərin bir neçəsi kinofestivallarda mükafatlara layiq görülüb.

Qeyd edək ki, xalq artisti Eldar Quliyev "Debüt" studiyasının bədii rəhbəri, Azərbaycan Dövlət Mədəniyyət və İncəsənət Universitetinin kino kafedrasının professoru, Bakı Beynəlxalq Multikulturalizm Mərkəzi Himayəçilik Şurasının üzvüdür. Professional Kinorejissorlar Gildiyasının ən fəal yaradıcılarından olan Eldar Quliyev Gildiya yaradılan gündən indiyədək qurumun prezidentidir.