İrəvan Azərbaycandan potensial neft məhsulları idxalının iqtisadi səmərəliliyini ölçüb-biçməlidir.

Axar.az xəbər verir ki, bu barədə erməni mediasına rusiyalı enerji eksperti Boris Martsinkeviç deyib.

“Məncə, bu, iqtisadiyyatın üstünlük təşkil etdiyi bir işdir. Logistik baxımdan əlverişlidir, amma təklif olunan qiymətlər və şərtlər, orada gizlədilən və dərhal görünməyən nələrsə olub-olmadığını diqqətlə araşdırmaq lazımdır”, - o bildirib.

Martsinkeviçin sözlərinə görə, Ermənistanın Azərbaycan neft məhsullarından asılılığının qarşısını almaq üçün tədarükçüləri diversifikasiya etmək lazımdır:

“Məsələn, Çində heç bir təchizatçı bütün neft, qaz və digər idxalın 20%-dən çoxunu tədarük etməməlidir. Fikrimcə, bu, çox düzgün yanaşmadır”.

Onun sözlərinə görə, Bakı neft emalı zavodu tam gücü ilə işləmir, hasilatı artırmaq potensialı var, lakin bu, çox güman ki, ağır neft tədarükü ilə bağlı Rusiya ilə razılığa gəlməyi tələb edəcək.

"Azərbaycan neft emalı zavodunda benzin, dizel və mazut istehsal edə bilmək üçün lazımi qarışıq əldə edilməlidir. Qazaxıstan nefti bir variant ola bilər, lakin bu halda onun tankerlə dənizlə daşınması o qədər də əlverişli deyil”.

Qeyd edək ki, Azərbaycan Ermənistana neft məhsullarının ixracını nəzərdən keçirdiyini bildirib. Gürcüstan isə Azərbaycan neft məhsullarının Ermənistana ilk tranzitinə görə rüsum tutmayacağını açıqlayıb.