Ana səhifə Siyasət |
Ümidvarıq ki, ABŞ Dağlıq Qarabağ münaqişəsinin həlli istiqamətdə öz üzərinə düşən işləri daha fəal həyata keçirəcək və bunu hansısa bir ölkənin inhisarına verməyəcək.
Bu sözləri Axar.az-a ABŞ Prezidenti Donald Trampın 28 May - Respublika Günü və XXIV Beynəlxalq “Xəzər Neft və Qaz-2017” sərgi və konfransı ilə əlaqədar Azərbaycan Prezidenti İlham Əliyevə ardıcıl 2 təbrik məktubu ünvanlaması ilə bağlı danışan millət vəkili Asim Mollazadə deyib. Millət vəkili bildirib ki, ABŞ-ın yeni rəhbərliyinin öz milli təhlükəsizlik maraqlarını və Azərbaycanın bu istiqamətdə önəmini vurğulaması çox müsbət haldır:
“Keçmiş administrasiyada 907-ci düzəlişin bir sıra müəllifləri erməni lobbisinə bağlı idi. Ancaq yeni administrasiyanın erməni diasporu ilə əlaqələri və onun qarşısında məsuliyyəti olmadığına görə, daha çox, ABŞ-ın maraqlarına xidmət edəcək. Bu maraqlardan biri də ondan ibarətdir ki, Azərbaycan təhlükəsizlik məsələlərində və terrorla mübarizədə ABŞ üçün böyük önəm daşıyır. Azərbaycan ABŞ və NATO-ya dəstək verir. Bununla yanaşı, Azərbaycan ABŞ-ın çox etibarlı enerji tərəfdaşıdır və bu istiqamətdə Amerikanın ən önəmli müttəfiqlərinin enerji təhlükəsizliyi üçün bir çox layihələri həyata keçirir. Çox istərdik ki, ABŞ Dağlıq Qarabağ münaqişəsinin həlli istiqamətində öz üzərinə düşən öhdəliklərini daha fəal yerinə yetirsin. Çünki Azərbaycanın ərazi bütövlüyü dəfələlə ABŞ tərəfindən çox mühüm bir amil kimi qiymətləndirilib. Ümidvarıq ki, ABŞ bu istiqamətdə öz üzərinə düşən işləri daha fəal həyata keçirəcək və münaqişənin həllini hansısa bir ölkənin inhisarına verməyəcək”.
Tarix
2017.06.02 / 09:29
|
Müəllif
Aygün Yusibova
|