Ermənistana artıq heç kim zəmanət verə bilməz.

Axar.az xəbər verir ki, bunu “Tert.am” saytına açıqlamasında rusiyalı politoloq Qriqori Trofimçuk söyləyib.

“Ermənistanın Qarabağ məsələsində hər zaman əsas tələbi ölkənin təhlükəsizliyi olub. 2016-cı ilin aprelində baş verənləri Ermənistan özünə birbaşa hücum kimi dəyərləndirir. O bilir ki, artıq təhlükəsizliyinə heç kim, hətta Moskva da zəmanət verə bilməz. Ona görə də İrəvanın nöqteyi-nəzərincə torpaqların geri verilməsindən artıq söhbət belə gedə bilməz. Ermənistan indi hər kəsdən təmas xəttində atəşin dayandırılmasına yardım edilməsini gözləyir. Bundan sonra onu yenidən inandıracaqlar ki, torpaqlar qarşılığında təhlükəsizliyinə zəmanət veriləcək. Lakin Aprel müharibəsi bunun o qədər də inandırıcı görünmədiyini ortaya qoydu. Belə zəmanəti heç kim verə bilməz. İndiki şəraitdə Ermənistana torpaqların qaytarılması ilə bağlı heç bir danışıqlar lazım deyil və Sərkisyan da bunu açıq şəkildə deyir. Bu danışıqlar yalnız Azərbaycana lazımdır, amma bu, əvvəlki kimi 20 il davam etməməlidir”, – deyə o bildirib.

Onun sözlərinə görə, Azərbaycanın Avrasiya İttifaqına daxil olması Qarabağ problemini həll etməyəcək:

“SSRİ zamanında respublikalar arasında ərazi problemi Moskvanın insanlıq tarixində görünməyən şəkildə sosial paketlə dövlətləri təmin etməsi ucbatından aktual deyildi. Bu gün belə şey ola bilməz. Avrasiya İttifaqı hansısa güzəştlər təqdim edir, amma sovetlərin zəmanət paketini verə bilmir. Ona görə də Azərbaycanın üzvlükdən öz ərazi bütövlüyünü bərpa etmək arzuları mümkün deyil. SSRİ bütün respublikalara etibarlı hərbi-siyasi müdafiə təminatı verirdi. Bakının Avrasiya İttifaqına üzvlüyü onun tamhüquqlu tərəfdaş kimi ərazilərlə bağlı tələbini artıra bilər. Əgər Bakı SSRİ-yə qayıtsaydı, Qarabağ ortadan qaldırılardı, lakin SSRİ artıq ölüb və bərpa oluna bilməz”.