Avstriya hökuməti 6 ildir bu ölkədə siyasi qaçqın statusu almaq istəyən azərbaycanlı ailə Qasımovların deportasiyası ilə bağlı qərar qəbul edib.

Axar.az xəbər verir ki, bu barədə məlumatı “Haqqin.az” yayıb.

Bildirilib ki, Siyafər və Şəmsiyyə Qasımovalar iki övladları ilə birgə 2016-cı ildə Azərbaycanı tərk ediblər. Avstriyaya gedən Siyafər Qasımov orda bildirib ki, müxalif Azərbaycan Demokrat Partiyasının (sədri Sərdar Cəlaloğludur) fəalıdır, həbs təhlükəsinə görə ölkədən qaçıb.

Qasımov Cənubi Avstriyada yerləşib, işə düzəlib, mexanik işləyib, Şəmsiyyə isə yerli universitetlərdən birinə qəbul olunub. Bu illər ərzində Qasımovlar vətənlərində siyasi təqibə məruz qaldıqlarını iddia ediblər.

Ancaq Avstriya Federal Məhkəməsi bugünlərdə 3-cü, sonuncu dəfə onların tələblərini rədd edib və Azərbaycana deportasiya haqda qərar verib.

“Azərbaycan Demokrat Partiyası real müxalifət partiyası deyil, hakimiyyətlə işləyir və onun üzvləri repressiyadan qorxmaya bilərlər. Həyat yoldaşı və övladlarını da Azərbaycanda heç bir təhlükə gözləmir”, - Federal Məhkəmənin qərarından bu sitatı “Kuryer” nəşri tirajlayıb.

Siyafər Qasımov isə bu qərarı faciəvi adlandırıb. O deyib ki, onun övladları hətta Azərbaycan dilini də bilmir, artıq avstriyalı olublar: “Burda iş tapmışam, övladlarım burda gimnaziyaya gedir, dostlarımız burdadır. Azərbaycana qayıtmaq mənim üçün faciəvi olacaq”.