Ötən gün Milli Məclidə “Tarix və mədəniyyət abidələrinin qorunması haqqında”, “Ətraf mühitin mühafizəsi haqqında” ,”Nəşriyyat işi haqqında”, “Lotereyalar haqqında”, “Təhsil haqqında” qanunlara əlavə və dəyişikliklərin müzakirəsi zamanı çıxış edən millət vəkili Qənirə Paşayeva bildirib ki, bu dəyişikliklər və əlavələr çox vacib və zərudidir və onları dəstəkləyəcək.

Axar.az xəbər verir ki, bununla belə, millət vəkili bu qanunların praktik tətbiqində daha ciddi tədbirlər görülməsinin vacibliyini önə çəkib.

”Hesab edirəm ki, qanunların həyata keçirilməsi istiqamətində müvafiq qurumlarım məsuliyyəti, qanunun yerinə yetirilməməsi zamanı cəzaların sərt olması, qanunların həyata keçirilməsinə nəzarət mexanizmlərinin daha da gücləndirilməsinə böyük ehtiyac var. Çünki qəbul edilən bir sıra qanunların bəzi maddələrinə illərdir ki, əməl olunmur. Buna görə məsuliyyət və cəza mexanizmlərinin sərtləşməsi ilə bərabər, bu qanunların həyata keçirilməsinə nəzarət mexanizmlərinin də güclənməsi lazımdır. Məsələn, elə götürək “Tütün və tütün məmulatı haqqında” Azərbaycan Respublikası qanununu. Orada deyilir ki, məktəblərə yaxın ərazilərdə siqaretin satışı, reklamı olmaz, 18 yaşına qədər uşaqlara siqaret satılması qadağandır və s. Amma təəssüf ki, qanunun bu maddələr real həyatda işləmir. Ona görə də bu gün bir sıra qanunlara etdiyimiz əlavə və dəyişikliklərin çalışması üçün mexanizmlər, məsuluyyət və cəzaların sərtləşdirilməsi də öz əksini daha ciddi şəkildə tapmalıdır. Qəbul olunan qanunların tam yerinə yetirilməsi çox vacib məsələdir”, - Qənirə Paşayeva bildirib.