Qubadan olan Nuray balamızın məsələsi bütün ölkənin diqqətini cəlb etdi. Artıq Ailə, Qadın və Uşaq Problemləri üzrə Dövlət Komitəsi səviyyəsində xüsusi komissiya yaradılıb və səlahiyyətli qrup məsələni araşdırmaqla məşğuldur. İnanıram ki, qısa zamanda ilk növbədə uşağın mənafeyi və istəyi nəzərə alınaraq müvafiq həm hüquqi, həm də mənəvi bir qərar qəbul ediləcəkdir.

Axar.az xəbər verir ki. bu sözləri millət vəkili Aydın Mirzəzadə Quba rayonunda baş verən məlum hadisəyə münasibət bildirərkən qeyd edim. Quba Rayon Məhkəmə icraçılarının uşağı xalasından alıb, atasına verməklə bağlı məhkəmə qərarını icra edərkən qeyri-insani davranışlarına laqeyd qalmayan A.Mirzəzadə inci bir məqama da diqqət çəkib:

“Bu məsələdə adı çəkilməsə də mövcud olan və mövqeyindən çox şey asılı olan bir nəfər vardır və mən ona öz hörmətimi bildirmək istəyirəm.

Bu, Nurayın atası Əvəz Bayramovun ikinci həyat yoldaşıdır.

O, razılıq verməsəydi, Nurayın atası böyük qızını öz indiki ailəsinə aparmaq üçün məhkəməyə müraciət etməzdi. Bu qadın bilir ki, həyat yoldaşının birinci ailəsindən olan qohumları ilə anlaşılmazlıqları var və Nurayı yeni ailəyə gətirmək asan deyildir. O bilirdi ki, öz qızına böyük bacı gələ bilər, Nurayın yeni ailəyə qovuşmasının bütün ağırlığı isə onun üzərunə düşəcəkdir.

Buna baxmayaraq, daim yoldaşının yanında olub və daha bir qızının olacağına inanıb. O və həyat yoldaşı hesab ediblər ki, Nuraya yeni ailədə daha yaxşı olacaqdır.

Ancaq həyat öz sözünü deyir və bu ailənin ideal saydığı variant alınmadı. Bununla belə yenə də Nurayın atasına dəstək verən, onun bu çətin psixoloji durumunda yanında o qadın olacaqdır.

İllər keçəcək, Nuray yetkinlik yaşına çatacaq, narazılıqları unudub, atasını tanımaq və ana qohumları ilə atasını barışdırmaq istəyəcək. Və bu zaman da bu işdə ona kiçik bacısının anası kömək olacaqdır”.