Bu gün Azərbaycan teatr və kino aktyoru, əməkdar incəsənət xadimi Cahangir Novruzovun doğum günüdür.

Axar.az xatırladır ki, Cahangir Novruzov 1954-cü il iyulun 31-də Bakıda doğulub. 1971-ci ildə orta məktəbi bitirib, sonra Mirzəağa Əliyev adına incəsənət institutunun rejissorluq fakültəsinə daxil olub və SSRİ xalq artisti Mehdi Məmmədovun rəhbərlik etdiyi sinifdə təhsil alıb.

1987-ci ildə Azərbaycan Mədəniyyət Nazirliyinin təşkil etdiyi Mirzə Fətəli Axundovun 175 illik yubileyinə həsr olunan teatr festivalında hazırladığı "Müsyö Jordan və Dərviş Məstəli Şah" və Azərbaycan Teatr Xadimləri İttifaqının təşkil etdiyi "I mono tamaşalar festivalı"nda (1991-ci il) Şekspirin "Hamlet" əsərinin motivləri əsasında hazırlanan "Olum ya Ölüm" tamaşası ilə birincilik qazanıb.

Cahangir Novruzov Azərbaycan kinosunun əvəzolunmaz aktrisası Nəsibə Zeynalovanın oğludur. O, Nəsibə xanımla bağlı xatirəsində anasının necə tələbkar və qayğıkeş biri olduğunu deyir:

"Nəsibə xanım mənə uşaqlıqdan işimdə tələbkar olmağı öyrədib. Musiqili Komediya teatrında işlədiyim müddət ərzində mənim onunla aktrisa və rejissor kimi gözəl münasibətim olub. Sizə maraqlı bir əhvalat danışım. Nəsibə xanım hər səhər işə gələndə yaxın aktrisalarla 15 dəqiqəyədək söhbət etdiyinə görə məşqə gecikirdi. Bir dəfə də anam işə gələndə özüm onlara yaxınlaşıb dedim ki, "hörmətli aktyorlar, xahiş edirəm, məşqə vaxtında gəlin". Dedim və salona keçdim. Gördüm, Nəsibə xanım bir az gecikir, ona görə də başqa səhnələri məşq eləməyə başladıq. 10-15 dəqiqə keçəndən sonra gəldi və baxıb gördü ki, onu gözləməmişik. Məndən soruşdu ki, "Adə, ay... məni niyə gözləməmisiniz?" Mən də bir az ciddi və rəsmi şəkildə cavab verdim ki, "hörmətli Nəsibə xanım, məşqə vaxtında gəlmək lazımdır". Mənə tərs-tərs baxıb getdi. O hadisədən sonra mənimlə çox soyuq davrandı. Ondan bir neçə gün sonra qonaqlıqda olduğuma görə axşam səhərki məşqə hazırlaşmamış yatdım. Səhər gəldik məşqə və səhnələri məşq etməyə başladıq. Bir neçə yerdə replikalar yadımdan çıxdı. Onda anam mənə dedi ki, "yoldaş rejissor, məşqə hazırlıqlı gəlmək lazımdır".

Qeyd edək ki, Cahangir Novruzov 1995-ci ildə Türkiyəyə dəvət olunub. Hazırda Adana şəhərində Çuxurova Universitetinin Dövlət Konservatoriyasının teatr bölməsində çalışır.