Əsas heyəti fiziki məhdudiyyətli aktyorlardan ibarət olan ölkənin ilk inklüziv ƏSA Teatrı amerikan yazıçısı Con Steynbekin əsərini səhnələşdirəcək.

Bu barədə Kult.az-a məlumat verən teatrın baş meneceri Nicat Qulam bildirib ki, hazırlanan bu tamaşa teatrın bir illik fəaliyyətində sayca üçüncü olacaq.

Fərqli quruluşa və estetikaya malik olacaq səhnə əsərində 6-sı fiziki məhdudiyyətli olmaqla 8 aktyor iştirak edəcək.

Tamaşanın quruluşçu rejissoru teatrının bədii rəhbəri Nihad Qulamzadədir.

Qeyd edək ki, ƏSA Teatrı 2016-cı ilin sentyabr ayında müstəqil şəkildə təsis edilib. Nəinki ölkəmizdə, öz fəaliyyətinə görə hətta hazırda dünyada da yeganə teatrdır.