Bu gün Azərbaycan Dövlət Dram Teatrında xalq yazıçısı Elçinin “Cəhənnəm sakinləri” pyesi əsasında hazırlanan tamaşasının premyerası baş tutub.

Kult.az xəbər verir ki, tamaşanın quruluşuçu rejissoru və rəssamı Azər Paşa Nemətov, rejissoru Anar Sadıqov, rejissor assistenti Dilbər İsmayılova, musiqi tərtibatçısı Kamil İsmayılovdur.

Tamaşada Azər Dadaşovun musiqisindən istifadə olunub.

Səhnə əsərində xalq artistləri Məleykə Əsədova (Qadın), Nurəddin Mehdixanlı (Qonaq), əməkdar artistlər Elşən Rüstəmov (Kişi), Mirzə Ağabəyli (Qonşu), aktyorlar Vüsal Mustafayev, Elçin Əfəndi, Ləman İmanova, Rüstəm Rüstəmov, Rada Nəsibova, Ramin Şıxəliyev, Xədicə Novruzlu iştirak edirlər.

145-ci teatr mövsümünün ilk premyerası olan tamaşa 1937-ci ildə milli fəlakət və faciə şəklində bütün ölkəni əhatə edən repressiya hadisələrindən bəhs edir. İnsanlara qarşı həyata keçirilən kütləvi təqib, mənəvi təzyiq ər və arvadı üz-üzə qoyur, onlar böyük qorxunun əsarəti altında satqına çevrilirlər. Günahlarını bir-birindən gizlətməyə çalışsalar da, günlərin birində evlərində peyda olan çağırılmamış qonaq (ər-arvada görə Şeytan) onların əsl mahiyyətini üzə çıxarır, qorxunun insan həyatında hansı faciələrə səbəb olduğunu göstərir.

Premyeraya müəlliflə bərabər Mədəniyyət və Turizm naziri Əbülfəs Qarayev, Bakı Xareoqrafiya Akademiyasının rektoru Timuçin Əfəndiyev, Mərkəzi Bankın sədri Elman Rüstəmov, millət vəkilləri, tanınmış incənənət xadimləri qatılıblar.

Tamaşa sabah da nümayiş olunacaq.