Türkiyənin məşhur “Paramparça” və “Diriliş Ərtoğrul” seriallarında canlandırdığı obrazları ilə milyonların sevimlisinə çevrilən tanınmış aktyor və rejissor Ərtoğrul Postoğlu və xanımı İlkay Özdin Postoğlu Azərbaycan Dövlət Musiqili Teatrında olub.

Teatrın mətbuat xidmətindən Kult.az-a bildirilib ki, səmimi keçən görüşdə iki qardaş ölkə arasında mədəni əlaqələrdən söhbət açılıb, bir sıra yaradıcı təkliflər səsləndirilib.

Teatrın direktorunun müavini Hüseyn Hüseynov qonağı teatrın binası ilə tanış edib, ona sənət ocağının tarixi, Prezident İlham Əliyevin müvafiq Sərəncamı ilə burada aparılan təmir işlərindən sonra ən müasir dünya standartlarına uyğun şəraitin yaradılması barədə məlumat verib.

Teatrla tanışlıqdan məmnunluğunu bildirən Ərtoğrul Postoğlu deyib: “Musiqili Teatrda nümayiş olunan maraqlı tamaşalarınız barədə türkiyəli həmkarlarımdan eşitmişdim. Həqiqətən, teatr bir çox cəhətlərinə görə digər xarici ölkələrdəki teatrlarla müqayisə oluna biləcək səviyyədə geniş yaradıcı və texniki imkanlara malikdir. Ən önəmlisi isə odur ki, Azərbaycanda dövlət səviyyəsində teatra, incəsənətə qiymət verilir. Yüz səkkiz illik tarixi olan möhtəşəm Azərbaycan Dövlət Musiqili Teatrının binasında olmağımız bizə şərəf verdi”.