Bakı Uşaq Teatrının kollektivi Türkiyənin Bilecik şəhərində keçirilən 13-cü Beynəlxalq Teatr Festivalında iştirak edir.

Kult.az xəbər verir ki, 13 noyabrda başlayan və 25 noyabra qədər davam edəcək festivalda Bakı Uşaq Teatrı “Ağıllı tülkü” və “Sevgi şimşəyi” tamaşaları ilə ölkəmizi təmsil edir.

“Ağıllı tülkü” uşaqlar üçün nəzərdə tutulub. Teatrın bədii rəhbəri-direktoru, əməkdar artist İntiqam Soltanın müəllifi və quruluşçu rejissoru olduğu tamaşa artıq bir neçə müddətdir ki, repertuardadır.

“Sevgi şimşəyi” isə repertuara yeni daxil edilib. Komediya janrında hazırlanmış bu tamaşanın həm Türkiyədə, həm də Azərbaycanda maraqla qarşılanacağı gözlənilir.

Qeyd edək ki, festivalın açılış törəni 12 noyabrda keçirilib. Açılışda Biləcik Bələdiyyə başqanı Nihat Can, Bilecik millət vəkili Səlim Yağcı, Bilecik valisi Tahir Böyükakın və başqa rəsmi şəxslər iştirak edib.

Festivala noyabrın 13-də Bakı Uşaq Teatrının “Ağıllı tülkü” tamaşası ilə start verilib.