Yeni il uşaqların ən çox sevdiyi bayramlardandır. Bu bayramı balacalar üçün daha yaddaqalan etməkdən ötrü bəzi teatrlar xüsusi proqram hazırlayıblar.

Kult.az xəbər verir ki, Akademik Milli Dram Teatrında dekabrın 22-dən başlayan və yanvarın 6-dək davam edəcək “Nindza Tısbağalar və kapitan Cekin macəraları” bayram tamaşası gündə dörd seans olmaqla, saat 11:00, 13:00, 15:00 və 17:00-da təqdim olunacaq. Nümayişdən sonra azyaşlı tamaşaçılara hədiyyələr təqdim olunacaq.

Gənc Tamaşaçılar Teatrında dekabrın 29-dan yanvarın 6-dək saat 12:00, 14:00 və 16:00-da Hans Xristian Andersenin “Qar kraliçası” tamaşası oynanılacaq.

Heydər Əliyev adına Sarayda dekabrın 29-u saat 12:00-da, dekabrın 30-u saat 15:00-da “Yeni il hekayəsi - musiqili nağıl”, yanvarın 2-də saat 13:00-da, yanvarın 3-ü saat 17:00-da “Şaxta baba və Küpəgirən qarı” əyləncəli və interaktiv tamaşası təqdim ediləcək.

Opera və Balet Teatrında dekabrın 30-da saat 14:00-da yeni il əhval-ruhiyyəli “Şovkonçik” baleti səhnələşdiriləcək.

Bakı Uşaq Teatrında yanvarın 2-i saat 11:00 və 13:00-da “Şaxta babanın toyu”, Kukla Teatrında isə dekabr ayının 26-dan yanvarın 6-dək saat 12:00, 14:00, 16:00 və 18:00-da “Qış nağılı” tamaşası oynanılacaq.

Bakı Dövlət Sirkində dünya sirk ulduzların iştirakı ilə keçiriləcək bayram proqramı dekabrın 28-dən yanvarın 13-dək davam edəcək. Qiymətlər sırasına görə 10, 12, 15 və 20 manat təşkil edir.