Ölkəmizin ilk müstəqil teatrı olan ADO maliyyə çətinliklərindən dolayı məkanını itirə bilər. Yaranmış problemlə bağlı 200-dən çox incəsənət nümayəndəsi Mədəniyyət naziri Əbülfəs Qarayevə açıq müraciət edib.

Kult.az müraciətin mətnini təqdim edir:

“Cənab Nazir! ADO Teatrı ölkəmizdə artıq 6 ildir ki, fəaliyyət göstərir. Bu illər ərzində teatr, çoxlu sayda yerli və beynəlxalq layihələrdə uğurla iştirak edib. Hazırda isə, teatr Bakı şəhəri, Mirzəağa Əliyev küçəsi 245 ünvanında yerləşən məkanını itirmək təhlükəsi ilə üz-üzə qalıb, icarə haqqını ödəməkdə çətinlik çəkir.

ADO teatrının məkan probleminin həll olunması istiqamətində müvafiq addımlar atmağınızı sizdən xahiş edirik. Hesab edirik ki, adı çəkilən teatrın fəaliyyətinin davam etməsi – Azərbaycanın müasir mədəniyyətinin formalaşmasında müsbət rol oynayacaq”.

Müraciəti Fəxrəddin Manafov, Ramiz Novruz, Afaq Bəşirqızı, Həmidə Ömərova, Bəsti Cəfərova, Rəfael Dadaşov, Ayşad Məmmədov və Bəhram Bağırzadə də daxil olmaqla 211 tanınmış sənət adamı imzalayıb.