Daşkəsən rayonunda bir müddət əvvəl aramsız yağan yağışlar nəticəsində qəzalı vəziyyətə düşən körpü bərpa edilib.

Azəravtoyol ASC-nin mətbuat xidmətindən Axar.az-a verilən məlumata görə, 1937-ci ildə inşa edilən və istismar müddəti bitən körpü 24 kilometr uzunluğunda olan Dəstəfur-Qıyıxlı avtomobil yolunun 9-cu kilometrliyində yerləşir.

Metal konstruksiyadan ibarət körpünün uzunluğu 10, hündürlüyü 8, eni isə 3,5 metrdir. Təmir-bərpa işləri zamanı körpü, demək olar ki, sökülərək yenidən tikilib. Dayaqlar və hərəkət hissə dəmir-beton, aşırım hissə isə metal konstruksiyalardan yenidən inşa edilib.

Daşkəsən-Xoşbulaq yolunun 5-ci km-də də selin yaratdığı fəsadlar aradan qaldırılıb. Yol daha təhlükəsiz əraziyə doğru genişləndirilib. Genişləndirilmiş hissənin uzunluğu təqribən 100 metrdir.

Avtomobil yolunun altından suların ötürülməsi üçün iki gözlü, 12 paqon-metr uzunluğunda və 1500 mm diametrində boru quraşdırılıb.

Qeyd edək ki, sel suları bir müddət bundan öncə avtomobil yolunun bir hissəsini və iki ədəd su borusunu sıradan çıxarmışdı.