STOP - 2.5 nişanıdır və “Dayanmadan keçmək qadağandır” adlanır. Sürücü bu nişanın tələbinə əsasən mütləq dayanmalıdır. “Dayanmadan keçmək qadağandır” yalnız xüsusi hallarda – görmə məsafəsi məhdud olduqda yolayrıcılarında, bitişik ərazilərdən çıxışlarda və ya dəmir yolu keçidlərində qoyulmalıdır.

Bu sözləri Axar.az-a açıqlamasında hüquqşünas Ərşad Hüseynov deyib.

Ekspert qeyd edib ki, digər hallarda sürücüyə yalnız yol verməyin zəruri olduğu halda dayanmaq öhdəliyi qoyan 2.4 – “Yol ver” nişanı quraşdırılmalıdır:

“Yol ver” nişanı elə yerlərdə qoyulur ki, sürücü baş yola çıxmazdan əvvəl hər iki tərəfi kifayət qədər görə bilir. Bu halda sürücü yalnız lazım gələrsə dayanır, yol boşdursa, dayanmadan hərəkəti davam etdirə bilər. Bu prosesi həyata keçirən mühəndislər əvvəlcə yolun görünmə məsafəsini ölçür, sonra uyğun nişanı seçirlər. Dünyanın hər yerində standart belədir”.

Ərşad Hüseynov əlavə edib ki, bir çox ölkədə 2.5 nişanlarının tətbiqi üzrə yeni yanaşmalar formalaşıb və qonşu dövlətlər də bu təcrübəni tətbiq edir:

“Bizdə isə nişanlarla, o cümlədən STOP nişanları ilə bağlı problemlər var. Bəzən onların lüzumsuz yerlərdə quraşdırıldığını görə bilərik. Bu da sürücülərdə qaydaya qarşı etinasızlıq yaradır. Bu yanlış yanaşma sürücüləri həmin nişana əməl etməməyə sövq edir, nəticədə həqiqətən vacib yerlərdə də qayda pozulur və qəza riski artır”.

Ekspertin sözlərinə görə, belə halların aradan qaldırılması vacibdir:

“STOP nişanı yalnız həqiqətən tələb olunan yerlərdə qoyulmalıdır. Əks halda yol hərəkətində təhlükəsizlik zəifləyir”.