Türkiyənin Muş vilayətində çoban qıtlığı yaranıb.

Axar.az xəbər verir ki, bəzi sahibkarlar 4 min türk lirəsi (təxminən 2100 manat) qarşılığında çoban axtarır.

Bundan başqa, çoban olmaq istəyən şəxslər hər ay 50 kq pendir, yun, telefon konturu, geyim və ayaqqabı ilə təmin olunacaq.

Çoban tapa bilmədikləri üçün gündüz uşaqları, gecə isə özləri bu işi gördüyünü deyən bölgə sakinlərindən biri övladlarının məktəbi yarıda buraxdıqlarını bildirib:

"300 qoyunum var. Çoban yoxdur. Gəzirik, tapa bilmirik. İndi oğlum gedir, kiçikdir. Məktəbdən çıxdı, oxumadı. Mən gedirəm, oğlum gedir, nəvəm gedir. Çoban tapa bilmirik. Buralarda çoban olmadığı üçün 4-5 min pul veririk, amma heç kim çoban olmaq istəmir. Buralarda çoban tapmaq çox çətindir, amma yenə də tapmağa çalışırıq".