Bakıda yarışa çıxan "Bakı Bus" avtobusları həm sərnişinlər, həm də hərəkət iştirakçıları üçün ciddi təhlükə yaradıblar.

Axar.az Oxu.az-a istinadən xəbər verir ki, bununla bağlı videogörüntü yayımlanıb.

Hadisə Salyan şosesinin Səbail rayonu ərazisindən keçən hissəsində qeydə alınıb.

Bakı Şəhər Dövlət Yol Polisi İdarəsindən (BŞDYPİ) bildirilib ki, videogörüntü ilə əlaqədar araşdırma aparılacaq və məsələyə araşdırmanın nəticəsinə uyğun olaraq hüquqi qiymət veriləcək.

Eyni zamanda, məsələ ilə bağlı "Bakı Bus" MMC-nin mətbuat katibi Əsmər Əliyeva deyib ki, Bakıda yarışa çıxan sərnişin avtobusları ilə bağlı yayılan görüntülər araşdırılır:

"Bakı Bus" MMC-nin istismarında olan 149 və 72 nömrəli müntəzəm marşrut xətləri üzrə fəaliyyət göstərən avtobusların sosial şəbəkələrdə yayılan görüntülərinə cavab olaraq bildiririk ki, məsələ hazırda "Bakı Bus"un aidiyyəti şöbəsi tərəfindən araşdırılır. Araşdırmanın nəticəsi ilə bağlı ictimaiyyətə məlumat veriləcək".