Azərbaycanlı biznesmen Emin Ağalarov və tərəfdaşları alkoqolsuz içkilər istehsalçısı olan Uni Pak MMC-nin kapitalını tərk ediblər. Oktyabrın 13-dən MMC-nin yeni sahibi Yeqor Kulikov olub.

Axar.az xəbər verir ki, bu barədə “Vedomosti” nəşri Rusiya Hüquqi Şəxslərin Vahid Dövlət Reyestrinə istinadla məlumat verib.

Ağalarovun nümayəndəsinin nəşrə verdiyi açıqlamasına görə, danışıqlar uzun müddətdir aparılırdı və biznesmen əsas işi olmadığı üçün aktivləri satmaq qərarına gəlib.

Rusiyalı investisiya bankiri İlya Şumov şirkətin 100%-lik payını 500-700 milyon rubl dəyərində qiymətləndirib.

Nəşr yazıb ki, 2022-ci ilin may ayında Emin Ağalarov əsas fəaliyyəti alkoqolsuz içkilərin istehsalı olan “Spaso - Borodino suları” zavodunda “Uni Pak” MMC-ni təsis edib. Həmin ilin oktyabrında Azərbaycan vətəndaşları Xəyal Abbaszadə, Fuad Əliyev və Nail Ağayev hər biri 25% olmaqla “Uni Pak”da səhm payı alıblar. 2023-cü ilin may ayında isə “Uni Pak” Azərbaycanda enerji içkilərinin istehsal olunduğu “Berg” ticarət nişanının qeydiyyata alınması üçün ərizə verib.