Yardımlı rayonunda TƏBİB-in yaradılmasının 7-ci ildönümünə həsr edilən "Doğma Torpağa Dəstək - Yardımlı Həkimlərinin Qurultayı" baş tutub.

Axar.az xəbər verir ki, tədbirin əsas məqsədi Yardımlı rayonu kimi dağlıq və ucqar regionda səhiyyə sahəsində mövcud problemlərin müzakirə olunması, gələcək planlar və təcrübə mübadiləsinin həyata keçirilməsi olub.

Tədbirdə müxtəlif tibb müəssisələrində fəaliyyət göstərən 30-dan çox həkim və Yardımlı Rayon Mərkəzi Xəstəxanasında fəaliyyət göstərən həkimlər iştirak edib.

Tədbirin rəsmi hissəsində Yardımlı Rayon İcra Hakimiyyəti başçısının müavini Miramil Səmədli rayon haqqında ümumi məlumat verib, region səhiyyəsində görülən işlər və qarşıya qoyulan hədəflər haqqında danışıb.

Yardımlı Rayon Mərkəzi Xəstəxanasının direktoru Ravil Qənbərov "Regional səhiyyənin inkişafı üçün Yardımlı Modeli" adlı yeni bir konsepsiyadan bəhs edib. Bu model bilik və təcrübə mərkəzinin yaradılmasını, mentorluq sisteminin qurulmasını və xeyriyyə fondunun formalaşdırılmasını nəzərdə tutulur.

R.Qənbərov həmçinin son 1 ildə görülən işlər, yeniliklər və gələcək planlar barədə tədbir iştirakçılarını məlumatlandırıb.

Daha sonra Ağciyər Xəstəlikləri Mərkəzinin direktoru Nəhmət Rəhmanov, Yardımlı Rayon Mərkəzi Xəstəxanasının baş həkimi və digər nüfuzlu həkimlər çıxış ediblər.

Tədbirin gələcək illərdə də mütəmadi olaraq keçirilməsi nəzərdə tutulub.