Paytaxtın Nəsimi rayonunda yerləşən oyun meydançasında hündür mərtəbəli bina tikilir.

Axar.az xəbər verir ki, bu barədə Alı Mustafayev, Seyid Cəfər Pişəvəri və Cavadxan küçəsinin sakinləri məlumat verib.

Onların sözlərinə görə, dörd yaşayış binasının yeganə oyun meydançası hasarlanıb, iki gün əvvəl tikinti işlərinə start verilib. Sakinlər ərazi hasarlananda etiraz edib. Lakin idman meydançasına ağır texnika yerləşdirən tikinti şirkəti etirazlara məhəl qoymayaraq öz işinə başlayıb.

Şirkətin nümayəndəsi Nəbi Mənsurov Xəzər xəbər-ə açıqlamasında tikinti işlərinin qanuni şəkildə aparıldığını, tələb olunan bütün sənədlərin də qaydasında olduğunu deyib.

Sakinlər isə 4 binanın yeganə oyun meydançasında bina tikilməsi barədə müvafiq icazə verilməsinin qanunsuz olduğunu iddia edib.

Nəsimi İcra Hakimiyyətinin Sənədlərlə və vətəndaşların müraciətləri ilə iş şöbəsinin müdiri Hamlet Baxışov problemdən yeni xəbər tutduğunu və məsələnin araşdırılması üçün əməkdaşların əraziyə baxış keçirəcəyini, yalnız bundan sonra müvafiq cavab veriləcəyini bildirib.