Sentyabrın 1-dən etibarən Bakıda bir sıra marşrut avtobuslarında kart sistemi tətbiq ediləcək.

Axar.az Xəzərxəbər-ə istinadən məlumat verir ki, sərnişinlər "Baku Bus" avtobuslarında olduğu kimi yalnız "Bakı kart" vasitəsi ilə ödəniş etməklə avtobuslara minə biləcəklər. Bunun üçün artıq 61, 65, 85, 79, 96 və 18 nömrəli marşrut xətlərindəki avtobuslara yeni cihazlar quraşdırılıb.

Avtobusların içində vurulan elanlar vasitəsi ilə isə sentyabrın 1-dən etibarən nağd ödənişin qəbul edilməyəcəyi barədə sərnişinlərə məlumat verilib.

Paytaxtdakı bəzi marşrut xətlərində avtobusların içinə kameralar quraşdırılıb ki, bu da sərnişinlər tərəfindən müsbət qarşılanır. Bakı Nəqliyyat Agentliyindən verilən məlumata görə, Nəqliyyatın İnkişaf Konsepsiyasına əsasən, ilin sonuna kimi şəhərdaxili əksər marşrut avtobuslarında kart sisteminin tətbiqi, kameraların quraşdırılması və digər zəruri yeniliklərin edilməsi üçün sahibkarlarla mütəmadi olaraq iş aparılır.