Bakı Metropoliteni QSC "eskalator təsərrüfatı üzrə növbətçi dispetçeri" və "mühəndis-texniki avadanlıqlar üzrə növbə dispetçeri" vəzifələri üzrə ödənişsiz kurs təşkil edir.

Axar.az xəbər verir ki, kurs 6 ay müddətində davam edəcək. Kursu müvəffəqiyyətlə bitirənlər Bakı Metropoliteni Qapalı Səhmdar Cəmiyyətində müvafiq vəzifə üzrə işlə təmin ediləcəklər.

Kursda 22-30 yaş arası kişilər iştirak edə bilər. Namizədlərin Bakı qeydiyyatında, hərbi mükəlləfiyyətli, texniki ali təhsilli olması vacibdir.

Namizədlərin Azərbaycan dilini əla, rus dilini yaxşı bilməsi tələb olunur.

Kursda iştirak etmək istəyənlər Bakı Metropoliteni QSC-nin rəsmi veb-səhifəsinin "Karyera və əməkdaşlıq" bölməsinə daxil olub elektron müraciət formasını doldurmalıdırlar.

Anket doldurularkən "İşləmək istədiyiniz işin adı" xanasına "Dispetçer" vəzifəsinin qeyd edilməsi zəruridir.

Müraciət üçün son tarix 25 avqust 2016-cı ildir.