Sahibsiz Uşaqlara Kömək İctimai Birliyi "İrəliyə doğru bir addım" layihə çərçivəsində 25-dən artıq qaçqın, məcburi köçkün və sağlamlıq imkanları məhdud yeniyetmə və gənclərin istirahətinin səmərəli təşkili və ruh yüksəkliyinin artırılması məqsədilə 26-29 avqust tarixlərində "Həyatımın üç gözəl günü" adlı Nabran turu təşkil edilib.

Axar.az xəbər verir ki, Azərbaycan Respublikası Prezidenti yanında QHT-lərə Dövlət Dəstəyi Şurasının maliyyə dəstəyi ilə baş tutan üç günlük tur çərçivəsində onlara ilkin kompüter bacarıqları öyrədilib. Həmçinin psixoloq tərəfindən onlarla söhbətlər edilib. Bununla yanaşı, layihə iştirakçılarından olan bir neçə valideynlə psixoloji təlimatlandırma aparılıb, intellektual yarışmalar, müsiqili-əyləncəli oyunlar keçirilib.

Qeyd edək ki, layihənin məqsədi qaçqın, məcburi köçkün, sağlamlıq imkanları məhdud uşaq, yeniyetmə və gənclərin cəmiyyətə inteqrasiyasına dəstək olmaqdır. Həmçinin qeyd olunub ki, layihənin digər məqsədi onların digər yaşıdları ilə bərabər şəkildə imkan və potensialını üzə çıxarmalarına stimul verməkdir.

Layihə 1 noyabra qədər davam edəcək.